Asi Lakh Namazan Nitiyan | Punjabi Poetry by Farhat Abbas Shah





asi lakh namazan nitiyan, asi sajde keetay lakh
kadi tibiyan raitan roliyan, kadi galiyan de which kakh
asen pakhu wichre daar tu, asi apnay aap tu wakh
asi waikhaya dil makhlooq da, dil buhe buhe rakh

asi ratan katiyan jaag ke, lag bariyan naal khalo
sadi akhein rastyan sariyan, dil dita dard paro
saday sah which sabar di chashni, sadi ragan which khushbo
sathon haar k saday hosle, paye kadan nap nap ro

asi ghabru sikday shehar de, saday khaban naal widan
asi khali khokhe zaat de, sanu chunjan maran kaan
asi mausam kache ishq de, sadi dhup bane na chhan
saday mathay bharay lakeer de, sadi qismat mool na thhan

asi mujrim ishq de jurm de, asi sufnay laye udeek
sathay lagan roz adaaltan, sanu pay jaye roz tareekh
nit aasan la la bethiye, nit dil tay mariye leek
kadi chhickay chan asmaan te, kadi mitti laway dhareek

asi jamdiyan naal de ghabray, asi qismat naal khafa
kadi patharan de which khaidde, kadi turde dhoor udda
asi bholay waang kabootaran, asi pagal waang hawa
asi apnay aap ibadati, asi apnay aap khuda

Poet: Farhat Abbas Shah
Voice: Imran Sherazi

جِیندے جاگدے لوک

اسیں لکھ نمازاں نیتیاں، اسیں سجدے کیتے لکھ
کدیں ٹبیاں ریتاں رولیاں ، کدیں گلیاں دے وچ کَکھ
اسیں پَکھو وِچھڑے ڈار توں، اسیں اپنے آپ توں وَکھ
اسیں ویکھیا دِل مخلوق دا، دِل بُوہے بُوہے رَکھ

اسیں راتاں کٹیاں جگ کے، لگ باریاں نال کھلو
ساڈی اکھیں رستیاں ساڑیاں، دل دِتّا دَرد پَرو
ساڈی ساہ وِچ صبر دی چاشنی، ساڈی رگاں وچ خشبو
ساتھوں ہار کے ساڈے حوصلے، پئے کدّگاں نَپ نَپ رو

اسیں گھبرُو سِک دے شہر دے، ساڈے خاباں نال وِداں 
اسیں خالی کھوکھے ذات دے، سانوں چُنجاں مارن کاں
اسیں موسم کچّے عشق دے، ساڈی دُھپ بنے نا چھاں
ساڈے متھّے بھرے لکیر دے، ساڈی قسمت مُول نا تھاں

اسیں مجرم عشق دے جُرم دے، اسیں سُفنے لَے اُڈیک
ساتھے لگّن روز عدالتاں، سانوں پئے جَئے روز تَریک 
نِت آساں لا لا بیٹھیئے ، نِت دِل تے مارئیے لیک
کدیں چھِکّے چَن اَسمان تے، کدیں مِٹّی لَوے دَھریک

اسیں جمدیاں نال دے گھابرے، اسیں قسمت نال خفا
کدیں پتھراں دے وچ کھیڈدے، کدیں ٹُردے دُھوڑ اُڈا
اسیں بھولے وانگ کبوتراں ، اسیں پاگل وانگ ہوا
اسیں اپنے آپ عبادتی، اسیں اپنے آپ خدا

شاعر: فرحت عباس شاہ
آواز: عمران شیرازی


No comments :

No comments :

Post a Comment